x

Пуужин устгах гэрээнээс АНУ, ОХУ-ын аль нь гарах гээд байна

Дунд болон ойрын тусгалтай пуужин устгах гэрээнээс гарна гэсэн шийдвэрээсээ АНУ татгалзахад бэлэн байна. Ийм болохоор яг энэ шийдвэрээ хүчин төгөлдөр болгон гэрээний үүргийг хүлээхээ зогсоох албан ёсны нот гаргахаа зургаан сараар хойшлуулж байна гэсэн байна. Энэ талаар ОХУ-ын Ерөнхийлөгч Владимир Путин Дунд болон ойрын тусгалтай пуужин устгах гэрээнээс Вашингтон гарах юм бол ОХУ араас нь энэ гэрээнээс гарна гэж мэдэгдсэний хариуд АНУ-ын Төрийн департаментын албан ёсын төлөөлөгч бямба гарагт мэдэгджээ.

“АНУ гэрээнээс гарч байгаагаа мэдэгдэх нот бичиг гаргах хүртлээ зургаан сарын хугацаа үлдээж байна. Хэрвээ Орос Дунд болон ойрын тусгалтай пуужингийн гэрээг эргэн харж шийдвэрээсээ буцвал бид ч асуудлыг эргэн харах болно” гэж Төрийн департаментын төлөөлөгч хэлсэн байна.

“Ганцхан Оросын талаас ийм өөрчлөлт гарахгүй бол, гэрээнээс гарна гэсэн манай шийдвэр хэвээр үлдэж, гэрээний бүхий л заалт, мөрдөх ажиллагааг өөрийн зүгээс зогсоох болно” гэж тэр мэдэгджээ.

Вашингтон Оросыг гэрээнд эргэн нэгдэхийг уриалаад “Ганцхан оросууд энэ гэрээг зөрчиж байгаа 9М729 пуужин, харвах сууриудаа устгачих. Энэ бол Орос гэрээнд эргэн нэгдэх сүүлчийн боломж. Дунд болон ойрын тусгалтай пуужингийн гэрээг аврах эсэх нь Оросоос шууд хамаарч байна” гэж Америкийн дипломат хэлсэн байна.

АНУ үүний өмнө дунд болон ойрын тусгалтай пуужингийн гэрээнээс гарч байгаагаа мэдэгдсэн нот бичгийг Орос, Белорус, Казахстан, Украинд өгсөн гэсэн ТАСС агентлагийн мэдээг АНУ-ын Гадаад хэргийн төлөөлөгч нотлоогүй байна. “Бидэнд энэ талаар тодорхой мэдээлэл алга байна” тэр хэлжээ.

Дунд болон ойрын тусгалтай пуужин устгах хэлэлцээрийг тэртээ 1987 онд АНУ, ЗХУ-ын хооронд байгуулж, Америкийн Ерөнхийлөгч Рональд Рейган, Зөвлөлтийн төрийн тэргүүн Михаил Горбачев нар гарын үсэг зурж 1988 оны зургадугаар сарын нэгнээс хүчин төгөлдөр болсон юм. Энэ гэрээгээр түүхэнд анх удаагаа зэвсэглэлийн бүхэл бүтэн ангиллыг устгахаар талууд тохиролцсон юм. Энд талууд 1000-5500 км-ийн тусгалтай баллистик болон далавчит пуужин, 500-1000 км-ийн тусгалтай ойрын тусгалтай пуужингуудаа устгахаар тохиролцсон юм.

Гэрээнд зааснаар гэрээ батлагд­санас хойш гурван жилийн хугацаанд 500-5500 км тусгалтай пуужин, түүний харвах суурь зэргийг устгах ёстой гэжээ.

Х.Өлзийбаяр "Ардчилал таймс" сонин

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл байхгүй байна

Top