NTV телевизийн санаачилгаар “Нийгмийн сүлжээнд хүүхдийн аюулгүй байдлыг хангах тухай” хуулийн төслийн хэлэлцүүлгийг 2 дахь удаагаа зохион байгууллаа.
Хэлэлцүүлгийн үеэр хүүхдийн цахим орчин дахь аюулгүй байдлыг хангах, эрсдэлээс урьдчилан сэргийлэх, эрх зүйн орчныг боловсронгуй болгох асуудлыг хэлэлцэв. Хуулийн төсөлд сургалтын хөтөлбөрт цахим аюулгүй байдал болон медиа мэдээллийн боловсролын агуулгыг үе шаттай тусгах зохицуулалт багтаж байгаа юм.
Ингэснээр хүүхдүүд өөрийгөө цахим эрсдэлээс хамгаалах мэдлэг, шаардлагатай нөхцөлд зөв арга хэмжээ авах чадамжийг эзэмших боломж бүрдэх юм. Мөн эцэг эх, асран хамгаалагчдын оролцоог нэмэгдүүлж, хүүхдийн цахим хэрэглээнд тавих хяналтыг сайжруулах, зөв дадал төлөвшүүлэхэд дэмжлэг үзүүлэхээр тусгажээ.
Түүнчлэн сургуулийн орчинд хүүхдийн хувийн мэдээллийн аюулгүй байдлыг хангах, хамгаалалттай сургалтын платформ ашиглах нөхцөлийг бүрдүүлэхээс гадна цахим эрсдэлд өртсөн хүүхдэд сэтгэл зүй болон хүүхэд хамгааллын үйлчилгээ үзүүлэх тогтолцоог бэхжүүлэх талаар Боловсролын яамнаас мэдээлэв.
