Энэ сарын 4-ний өдрөөс эхлэн “Монгол эр хүн” зорилтот төслийн хүрээнд 17 настай эрэгтэй суралцагчдын эрүүл мэндийн үзлэг, шинжилгээнд хамруулж эхэлсэн. Гурван өдрийн дараах байдлаар үзлэгт хамрагдсан сурагчдаас хоол боловсруулах замын эмгэг түгээмэл оношлогдож байгааг ЭМГ-ын Өсвөр үеийн эрүүл мэнд хариуцсан эмч Г. Лхам-Янжин онцолж байна.
Мөн тогтворгүй хооллолт нөлөөлдөг бөгөөд үүнд хоолоо сойх, эсвэл хэт их идэж цөсний хүүдийг цочроож буй нь илэрчээ.
Мөн өгсөх замын халдвар буюу гэдэсний үрэвсэл нь цөсний хүүдийд нөлөөлж байна гэв. Цөсний хүүдийн үйл ажиллагааг алдагдуулснаар чулуу үүсэх эрсдэлийг нэмэгдүүлдэг байна.
Арьс харшлын өвчин, батгашилт давамгайлж байгаа бол мэс заслын нарийн мэргэжлийн эмчилгээ шаардлагатай тохиолдлууд ч илэрч байна.
Таван хүүхэд тутмын дөрөв нь амны хөндийн үрэвсэл, шүдний цооролтой гэж оношлогджээ.
Төслийн хүрээнд зөвхөн 17 настай сурагчдыг уг үзлэг, оношилгоонд хамруулж байгаа нь 18 нас буюу цэргийн албанд татагдах насанд хүрэхэд эрүүл чийрэг, бие бялдартай иргэн бэлтгэхээр эрүүл мэндийн бүрэн шинжилгээнд хамруулж эрсдэлээс урьдчилан сэргийлж байгаа юм.
Тэдгээр хүүхдүүд нь илүүдэл жин, таргалалттай идэвхгүй амьдралын хэв маяг дассан, сэтгэц, зан төрхийн шалтгаант эмгэг, хорт зуршилд өртөмтгий, нойргүйдэл давамгайлжээ.
Тиймээс аймгийн ЭМГ-ын НЭМТ, Нэгдсэн эмнэлэг хамтарч эрүүл мэндийн боловсрол олгох чиглэлээр ажиллаж дээрх нөхцөл байдлаас ангижрахад нь дэмжлэг болжээ.
