Төрийн ордноос шуугиан тарьсан “дотоожны хэрэг” дөнгөн данган намжиж ахуйд Боловсролын салбарын бодлогыг тодорхойлогч нарын суудаг саарал байшингаас бас нэгэн “бандааш”-ны дуулианыг сошиал орчинд эхлүүлжээ.
Сайдын суудлаа өгөх хоногоо хүлээж сууж буй Ц.Цогзолмаагийн хэвлэлийн төлөөлөгч эмэгтэйн сошиал орчин дахь мэдэгдлээс үзвэл тус яамны Төрийн нарийн бичгийн дарга Б.Баярсайхан “дотоожны асуудал”-д холбоотой бололтой.
Тэрээр, “Өчигдөр яамны аппаратын хурал дээр манай Төрийн нарийн бичгийн дарга Б.Баярсайхан өөрийнх нь бандаашаа тайлж дэггүйтсэн явдлыг намайг бичсэн гэж гүтгэв. Ямар ч баримтгүй хүнийг ингэж гүтгэж болдог юм уу? Та баримтаа гаргаж ирнэ үү! Эсвэл хамт олны өмнө уучлал гуйна уу! Үгүй бол би хүн гүтгэсэн, хувь хүний нэр төрд халдсан хэргээр хуулийн байгууллагад хандах болно.
Та бол төрийн захиргааны төв байгууллагад хариуцлагатай, өндөр алба хашдаг төрийн албан хаагч хүн. Албан тушаалаараа далайлган, "Миний бандаашаа тайлсныг чи л бичсэн" гэж чичилж, гүтгэж суухын оронд алхам тутамдаа ёс зүйтэй байх нь нэн тэргүүний үүрэг, хариуцлага юм гэдгийг та бас ухамсарлах хэрэгтэй болов уу” хэмээсэн байв.
Үүний дараа буюу өнгөрсөн ням гаригт Ц.Цогзолмаа сайд мөн өөрийнхөө фэйсбүүкт, “Сүүлийн өдрүүдэд манай яамны төрийн нарийн бичгийн даргын хувь хүний ёс зүйгүй үйлдлийг тойрсон мэдээлэл нийгмийг бухимдуулж байгаад харамсаж байна. Төрийн өндөр хариуцлагатай албанд ажиллуулах хүмүүсийг томилохдоо мэргэжлийн шаардлагыг чухалчлахаас гадна хувь хүний төлөвшил, ёс зүйн шалгуурыг нэн тэргүүнд анхаарах ёстой. Өөрийнхөө хийсэн буруу үйлдэлд бусдыг буруутгаж, албан тушаалын дарамт үзүүлж бүр ч болохгүй. Төрийн албан хаагчдынхаа төлөө шударга үгийг хаана ч хэлж, хамгаалах болно” гэсэн мэдэгдлийг хийсэн байна.
Боловсролын салбарын эмэгтэйчүүдийн боловсон бус эдгээр мэдэгдлүүд сошиал орчинд хэрүүлийн алим тарихын зэрэгцээ, БСШУСЯ-нд чухам юу болоод байна, энэ салбарыг ямар гээчийн ёс зүйтэй хүмүүс удирдаад байна вэ гэсэн эргэлзээ, эгдүүцлийг төрүүлээд байна.
“Дотоожны хэрэг”-т холбогдоод буй төрийн нарийн бичгийн дарга хатагтай үнэхээр тийм үйлдэл хийсэн үү, тэр нь олон нийтийн дунд болсон явдал уу, яамныхаа аппаратын хурал дээр хэвлэлийн төлөөлөгч рүүгээ дайрсан уу гэдэг нь одоогоор тодорхойгүй. Эсвэл Б.Баярсайхан Ц.Цогзолмааг ажлаа өгсний дараа сайд болох магадлалтай хүний тоонд багтсан нь энэхүү хэрүүлийн алимыг тарих шалтгаан болов уу.
Ямартай ч, энэ үйл явдал боловсролын салбарыг удирдаж яваа эмэгтэйчүүдийг боловсон биш бас ёс зүйгүй харагдуулж орхилоо. “Үхэхдээ үхэр буугаа тавина” гэдэгчлэн , улс төрийн хариуцлага хүлээж, сайдын суудлаасаа буухын өмнө амжиж тавьсан энэ “сум” нь Боловсролын сайдыг хэн удирдаж байв гэдгийг эргэцүүлэхэд хүргэлээ.
Сэтгэгдэл (1)