Хавдар судлалын үндэсний төв (ХСҮТ) хавдрын гол үйлчилгээнүүдийн хүлээгдэл, чирэгдлийг арилгах зорилт тавин ажиллаж, өмнө нь 1–2 сар хүлээдэг байсан туяа эмчилгээг ердөө хоёр хоногийн дотор авах боломж бүрдүүлжээ.

Эрүүл мэндийн сайд Т.Мөнхсайхан өчигдөр мэдэгдэл хийхдээ, “Төвлөрлийг сааруулах бодлого”-ын хүрээнд тусламж үйлчилгээний хэт төвлөрлийг багасгаж, хими ба бай эмчилгээний хүлээгдлийг ч арилгана гэдгийг онцолсон байна.

Уг зорилтын хүрээнд хими, бай эмчилгээг зөвхөн ХСҮТ-д төвлөрүүлэх бус, аймаг, дүүргийн эмнэлгүүд дээр үзүүлдэг болгох замаар иргэдэд ойртуулна. Энэ нь орон нутгийн иргэдэд эмчилгээ авахад хялбар болж, шилжилт хөдөлгөөн, зардлыг бууруулах чухал алхам болно гэж салбарынхан үзэж байна.

Туяа эмчилгээний хүлээгдлийг ийн богино хугацаанд бууруулсан туршлага дээр үндэслэн хими ба бай эмчилгээний хүртээмжийг сайжруулах ажлыг нэг сарын дотор хийж дуусгана гэж Эрүүл мэндийн яам мэдэгджээ.

Эх сурвалж: Эрүүл мэндийн яам, ХСҮТ