Энэ асуултад хариулт өгөхөд тун чиг хэцүү болоод байна. Учир нь Засгийн газрыг огцруулах асуудлаар МАХН болоод О.Баасанхүү гишүүний байр суурь 180 хэмээр зөрөв.
Өчигдөр МАХН-ын Гүйцэтгэх товчоон гишүүн Э.Бямбасүрэн Засгийн газрыг огцруулах эсэх асуудлаар намынхаа өмнөөс мэдэгдэл хийжээ. Тэр “Манай нам ард түмний талд ажиллана. У.Хүрэлсүхийн Засгийн газар олон жил гацсан байсан ажлуудыг хөдөлгөсөн. Энэ ажлыг нь тасалдуулах зорилго нөгөө бүлэгт нь байна. Манай намын хувьд Засгийн газрыг үргэлжлүүлэн ажилуулж үр дүнг нь хармаар байна” гэв.
Өөрөөр хэлбэл энэ бол МАХН-ын дарга Н.Энхбаярын /тамга түүнд бий учраас/ байр суурь. Харин МАХН-аас УИХ-д сууж буй цорын ганц гишүүн О.Баасанхүү үүнээс нь урьтаад “Засгийн газрыг огцруулах нь зүйтэй” гэдгийг нэгэнт хэлчихсэн.
Тэгэхээр МАХН болоод түүний УИХ дахь төлөөлөл хоёрын байр суурь дахиад л алд дэлмээр зөрлөө. Зөрсөн төдийгөөр асуудал дууссан бол ч яахав. Гэтэл МАХН-ын Гүйцэтгэх хороо “Манайх УИХ-д ганц гишүүнтэй. Ганц гишүүн маань ард түмний талд гэдгээ хэлчихсэн” гэж гүтгэв. Ингээд О.Баасанхүү, Н.Энхбаяр хоёрын аль нь МАХН бэ гэдэг асуулт үлдлээ. Хэрвээ О.Баасанхүү МАХН юм бол, түүний байр суурь МАХН-ыг төлөөлдөг бол МАХН энэ удаад У.Хүрэлсүхийн Засгийн газрыг дэмжихгүй. Харин Н.Энхбаяр МАХН юм бол О.Баасанхүү МАХН биш, тус намыг төлөөлөхгүй гэдэгтэй МАХН-ын дарга, гишүүд эвлэрэх хэрэгтэй болов.
Б.ЗАЯА