Өмнөговь аймгаас сонгогдсон УИХ-ын гишүүн Л.Энхболд ярилцлага өгчээ. Тэр байгаль орчныг сүйтгэж буй уул уурхай, уурхайчидтай уулаа тахиж тэмцсэн туршлагаа хуваалцжээ. Эрхэм гишүүн “Монголын ард түмнийг хоолтой, ундтай байлгаж байгаа газар нутаг маань уурхайчдын уршгаар сүйдэж, усны хомстол, цаг уурын эрс өөрчлөлт, цөлжилт, ган гачиг болж байна. Сүүлийн жилүүдэд бороо хур бага орсноос үүдэж ган гачиг болж малчдын амьдрал хүнд байна. Нутаг орон маань ийм нөхцөл байдалд хүрсэн учраас төрийн тахилгат хайрханы тэнгэрийг тайх ёслолыг Ерөнхийлөгчийн захирамжийн дагуу үйлдэж, зохих зан үйлийг хийсэн” гэв. Тахилга нь зүгээр нэг байгальд хүндэтгэл үзүүлсэн ёслол төдий зүйл бус. Уул, усныхаа амин чанар болох лус савдгийг аргадаж, тэдэнтэй оюун санааны хүчин чадлаар холбогдон харилцах явдал гэнэ. Энэ тухайгаа “Яг үнэндээ уул уурхайн уршгаар л энэ тахилгыг үйлдэж байгаа юм шүү дээ” хэмээн учирласан байна.
Мөн эрхэм гишүүний зургийг нийгмийн сүлжээгээр тараасан нь түүнийг зохион байгуулалттайгаар гүтгэн доромжилсон явдал гэв. Учир нь тахилгын ёслолыг үйлдэхдээ Л.Энхболд гишүүн “Өмнөговь аймгийн нутаг дэвсгэрийг ухан сэндийлж, байгаль дэлхийг хилэгнүүлсэн хүмүүсийн эсрэг хийж буй үйлдэл” хэмээн сэтгэсэн байна. Өнгөрсөн жил Хан Хөхий уулын тэнгэрийг тайх төрийн тахилгын ёслолд Ерөнхийлөгч Х.Баттулга төрийн элч төлөөлөгчөөр Б.Чойжилсүрэн гишүүнийг томилж байсан. Удахгүй Ховд аймагт болох тахилгад Б.Пүрэвдорж гишүүн Ерөнхийлөгчийн өмнөөс элч төлөөлөгчөөр оролцох болсныг дурьдаад “Тэр цагт над шиг шүүмжлүүлэхгүй өнгөрөхийг чинь харна аа” хэмээн барьцсан байна.
Манай 76-гийн тэнэглэл, мунаглал улам бүр төгсөрч байна даа. Уул тахих нь байгалиа хамгаалах, байгалийг сүйтгэгчидтэй тэмцэх шилдэг арга гэж итгэдэг УИХ-ын гишүүдтэй бид яана аа?!
Б.ГАЛ